Атырауда ту теріс ілінген. Тұрғындар мемлекеттік рәміздерге құрметсіздік танытқандарға наразылық білдірді, - деп хабарлайды Аqshamnews.kz Azh.kz сайтына сілтеме жасап.
Куәгерлердің айтуынша, ту бұл күйде бірнеше сағат бойы ілініп тұрған.
Қала мен облыстың символы саналатын флагшток қала әкімдігінің балансында. Алайда тұрғындар оның жай-күйін ешкім дұрыс қадағаламайтынын айтады. Әлеуметтік желілердегі қызу талқылаудан соң ту алынды. Дегенмен қолданушылар бұл немқұрайлыққа жол бергендерді анықтап, жауапқа тартуды талап етті.
"Бұл жай ғана шүберек емес - бұл елдің символы. Мұндай жайтқа бейжай қарауға болмайды", - деп жазады тұрғындар.
Атырау әкімдігі жағдайға пікір білдірді.
"17 қазанда туды көтеру барысында мердігер ұйым қызметкерлері техникалық қателік жіберген, ту теріс ілініп кеткен. Бұзушылық жедел анықталып, ту талаптарға сәйкес орнатылды. Бұл құқықбұзушылық дерегі бойынша мердігер ұйымның қызметкері Қазақстан Республикасының Әкімшілік құқықбұзушылық туралы кодексінің 458-бабы ("Қазақстан Республикасының Мемлекеттік рәміздерін пайдалану қағидаларын бұзу") бойынша әкімшілік жауапкершілікке тартылды", - делінген хабарламада.
Бұл бапқа сәйкес, мемлекеттік рәміздерді пайдалану қағидаларын бұзғаны үшін 50 айлық есептік көрсеткіш мөлшерінде - 184 600 теңге (жеке тұлғалар үшін) айыппұл көзделген. Дәл осындай жаза мердігер ұйым қызметкеріне қолданылды.