Атырауда студент қыз қатарласын аяусыз соққыға жығып, қылмыстық іс қозғалды, - деп хабарлайды Aqshamnews.kz.
Оқиға қаладағы саябақтардың бірінде болған. Видеосы әлеуметтік желіде тарады.
Желіде тараған бейнежазбада ақ түсті кофта киген қыздың жерге құлаған қатарласына жұдырықпен бірнеше рет соққы жасап, кейін басынан теуіп жатқан сәті анық көрінеді.
Полиция түсініктеме берді
Атырау облыстық полиция департаменті күдікті қыздың ұсталғанын хабарлады. Ол қазір Кәмелетке толмағандарды бейімдеу орталығына жеткізілген.
"Барлық қатысушы профилактикалық есепке алынады. Материалдар кәмелетке толмағандар ісі жөніндегі комиссияға жолданды. Сондай-ақ, балаларды тәрбиелеуде міндеттерін дұрыс орындамағаны үшін кәмелетке толмағандардың ата-аналары әкімшілік жауапкершілікке тартылып жатыр", - деп мәлімдеді полиция.
Ведомство оқиғаны видеоға түсіріп, әлеуметтік желіге жүктеп, бірақ полицияға хабарламаған жасөспірімге де құқықтық баға берілетінін атап өтті.
Жәбірленушіге көмек көрсетілді
Балалардың құқықтарын қорғау комитеті зардап шеккен қыздың ауруханаға жеткізілгенін хабарлады. Дәрігерлер оған қажетті медициналық көмек көрсетіп, кейін үйіне жіберген. Қызға қосымша психологиялық қолдау ұйымдастырылады.
Комитеттің мәліметінше, колледж тарапынан да жұмыс жүргізіліп жатыр: ата-аналармен және студенттермен әңгімелер өткізілген, облыстық білім басқармасы жағдайды тексеріп, арнайы бұйрық шығарған. Аймақтық балалар омбудсмені де оқиға орнына барып, жағдайды бақылауда ұстап отыр.