Атырау облысында 83 жастағы әйелдің өліміне қатысты іс бойынша сот шешімі шықты, деп хабарлайды Aqshamnews.kz тілшісі.
Қайғылы жағдай 2025 жылдың мамыр айында Жасқайрат ауылында болған. Тергеу материалдарына сәйкес, ер адам төсек тартып жатқан анасын күту үшін өз үйіне көшіріп әкелген. Алайда бұл шешімге жұбайы қарсы болып, отбасында жанжал жиілеген.
Бірнеше аптадан кейін күйеуі үйде жоқ кезде әйел қарт анаға ас үй пышағымен бірнеше рет соққы жасаған. Ауыр жарақат алған зейнеткер аудандық ауруханаға жеткізілгенімен, дәрігерлер оның өмірін сақтап қала алмаған.
Кешенді сот-психиатриялық сараптама қорытындысына сәйкес, айыпталушы параноидты шизофрения дертіне шалдыққан. Денсаулық жағдайына байланысты ол сот процесіне қатыспаған.
Сотта куәгерлердің жауаптары, оқиға орнын тексеру хаттамалары, бейнежазбалар мен сараптама қорытындылары қаралған. Прокурор айыпталушыны қарқынды бақыланатын мамандандырылған психиатриялық стационарда мәжбүрлеп емдеуді сұрады. Жәбірленуші тарап бұл ұсынысты қолдады.
Сот Қылмыстық кодекстің 99-бабы 2-бөлігі 3-тармағында көзделген әрекет есі дұрыс емес жағдайда жасалған деген қорытындыға келіп, ҚК-нің 16-бабына сәйкес әйелді қылмыстық жауаптылықтан босатты. Қаулыға сәйкес, оған медициналық сипаттағы мәжбүрлеу шарасы ретінде мамандандырылған психиатриялық мекемеде қарқынды бақылаумен ем қабылдау тағайындалды.