Еліміздегі энергетикалық тәуелсіздікті қамтамасыз етудің маңызды мәселесі ретінде атом электр станциясын (АЭС) салудың қажеттілігін ерекше атап өткім келеді.
Әлемдік көшбасшы елдер ондаған жылдар бойы бейбіт атом энергиясын қолданып келеді. Атом электр станциялары таза және сенімді энергия көзі болып табылады. Бұл — Қазақстанның энергетикалық қауіпсіздігін нығайтуға, көмірсутек ресурстарына тәуелділікті азайтуға және экологиялық қауіпсіздікті қамтамасыз етуге зор мүмкіндік, деп хабарлайды aqshamnews.kz.
Көмір генерациясы арқылы алынған энергияға көміртегі салығы енгізілуі мүмкін, бұл қазақстандық тауарлардың бәсекеге қабілеттілігін төмендетуі ықтимал. Осы себепті бізге елдің дамуының кепілі болатын таза және сенімді энергия көзі қажет. АЭС — дәл сондай энергия көзі.
Атом энергетикасы арқылы елімізде ғылым мен технологиялар саласы дамып, жаңа мүмкіндіктер ашылады.
Құрметті азаматтар! Алдағы қазан айында өтетін республикалық референдумға белсенді қатысып, еліміздің энергетикалық болашағын бірге таңдауға шақырамын. Бұл — біздің ортақ жауапкершілігіміз және еліміздің тұрақты дамуына қосатын үлесіміз.
Мұқаш Зұлқарнайұлы, ҚР Парламенті Мәжілісінің депутаты