Қазақстан интернет қауымдастығының басшысы Шавкат Сабиров «Facebook» парақшасында «mediametrics.kz» сервисінің индикаторлары арқылы желілік БАҚ пен әлеуметтік желілердегі ақпарат ағынын бақылау нәтижелерін жариялады.
«Әр 5 секунд сайын біз 1500-ден астам онлайн БАҚ-тан мәліметтер аламыз. Атом электр станциясын салу жөніндегі референдум тақырыбы бойынша Қазақстанның ақпараттық өрісін талдадық», – делінген жазбада.
Ш. Сабиров 16-22 қыркүйек аралығында жүргізілген апталық мониторинг нәтижелерін ұсынды. Талдауға «атомдық электр станциясы», «энергия тапшылығы», «атомдық энергия», «бейбіт атом», «ядролық реактор», «референдум», «Үлкен ауылы» сияқты іздеу кілт сөздері қолданылған.
Сервис нәтижесінде желілік БАҚ-та 3 мыңнан астам жарияланым тіркеліп, олардың 80%-ы бейтарап, 18%-ы оң, ал 2%-ы теріс сипатта болған.
Әлеуметтік желілерде көрсеткіштер әлдеқайда жоғары: 80 мыңнан астам ескертпе тіркеліп, олардың 82%-ы бейтарап, 16%-ы оң, ал 2%-ы теріс болған.
Автор жарияланымда интернеттегі БАҚ-та талқыланатын негізгі тақырыптарды атап көрсетті:
- Электр энергиясының тапшылығы;
- АЭС жұмысының сенімділігі мен қауіпсіздігі;
- Елдің энергетикалық қажеттіліктерін қанағаттандыру (орта және ұзақ мерзімді перспективада);
- Экономиканың, ғылымның дамуына және азаматтардың өмір сүру сапасын жақсартуға әсер ету;
- Экономикалық өсу үшін елдің энергетикалық әлеуетін арттыру;
- «Атом энергетикасының» жаңа саласын қалыптастыру және құру;
- Ядролық медицинаның дамуы.
Зерттеу нәтижесінде Ш. Сабиров АЭС тақырыбы мен Республикалық штаб қызметінің кеңінен қамтылғанын (интернеттегі БАҚ-та айтылғандардың 30%-дан астамы), сондай-ақ сарапшылар, қоғам белсенділері, депутаттар мен белгілі тұлғалардың ядролық энергетиканы қолдаудағы белсенділігін атап өтті. Сонымен қатар, басқа тақырыптар арасында армия реформасы, құқық қорғау органдарындағы өзгерістер, банктердің проблемалары және суицид мәселелері де талқыланған.