Тоғызқұмалақты бүгінде Африканың сегіз елінде 100 жуық адам ойнайды, деп хабарлайды aqshamnews.kz.
24.kz арнасы таратқан ақпаратқа сай, бұл туралы Дүниежүзілік тоғызқұмалақ федерациясының Африка құрлығына жауапты вице президенті Киагаба Хадсон хабарлады. Оның айтуынша қара құрлық жұрты тоқығзқұмалақты Дүниежүзілік көшпенділер ойындары арқылы таныған.
Ол Африка халықтарының овари, манкала сынды үстел ойындарына ұқсас болғандықтан үйрену аса қиынға соқпаған. Бүгінде аймақ өкілдері халықаралық жарыстарға қатысып жүр. Тіпті оның зияткерлік пайдасын ескеріп, мектептерге үйірме ретінде енгізуге ниетті. Оған биыл елордада өткен халықаралық жарыс зор ықпал еткен.
Киагаба Хадсон, Дүниежүзілік тоғызқұмалақ федерациясының Африка құрлығы бойынша жауапты вице-президенті:
- Қазір Африкадағы Бенин, Нигерия, Гана, Кот-д-Ивуар, Эфиопия, Танзания мен Угандада тоғыз құмалақшалар көбейіп келеді. Аталған елдерде осы ойынға деген қызығушылық артып келе жатқандықтан, алдағы уақытта өңірде құрлықтық чемпионат өткізуді жоспарлап отырмыз. Қазір білікті бапкерлер аз болып тұр. Сондықтан оларды Қазақстан не Қырғызстанға жіберіп шеберліктерін шыңдасақ деп демеушілер іздеп жатырмыз.
Букари Идриссу, тоғызқұмалақ үйретуші:
- Бенинде тоғызқұмалаққа қызығатындар қазір елдегі мәдениет орталықтарында бас қосады. Соңғы рет өткен қалалық жарысқа 50 адам қатысты. Жеке өзім өткізетін тоғызқұмалақ сабақтарына 60-қа жуық оқушы қатысады. Алда уақытта клуб құрсам деген ойым бар. Себебі бұл ойын адамның ойлау қабілетіне өте пайдалы.