Әлеуметтік желіде Астана көшелерінің бірінде қолына пышақ ұстап жүрген ер адамның видеосы тарады. Полиция оның жеке басын анықтап, бөлімге жеткізді, деп хабарлайды Aqshamnews.kz тілшісі.
Әлеуметтік желіде Астанада ер адамның көшеде қолына пышақ ұстап жүгіріп жүргені түсірілген видео кеңінен тарады.
Куәгерлердің айтуынша, оқиға Достық пен Республика көшелерінің қиылысында болған. Жарияланған кадрлардан ер адамның өзін оғаш ұстап, пышақпен көшеде жүгіріп жүргені көрінеді. Тіпті оның біреуді қуып жүргендей әсер қалдырғаны айтылған.
Біршама уақыттан кейін ол жол үстіне қалдырып кеткен көлігіне қайта оралып, көлікке отырып, оқиға орнынан кетіп қалған.
Астана қалалық Полиция департаментінің баспасөз қызметі ер адамның жеке басы анықталғанын хабарлады.
«Құқық бұзушы анықталып, полиция бөліміне жеткізілді. Ол уақытша ұстау бөлмесіне қамалды. Қазіргі уақытта болған оқиғаның барлық мән-жайы анықталып жатыр. Оған қатысты ұсақ бұзақылық фактісі бойынша әкімшілік материал толтырылды. Іс құжаттары сотқа жолданды», – делінген полиция хабарламасында.