Астанада полиция майоры "жігітіне көрсеткен қамқорлығы үшін" 4 жылға сотталды, - деп хабарлайды Aqshamnews.kz тілшісі Azattyq Rýhy-на сілтеме жасап.
Астана қаласының қылмыстық істер жөніндегі ауданаралық соты полиция майоры Айдана Қалыбайды қызметтік өкілеттігін теріс пайдаланғаны үшін кінәлі деп танып, 4 жылға бас бостандығынан айырды. Сонымен бірге оған мемлекеттік қызметте лауазым иелену құқығына өмір бойына тыйым салынды.
Майор не бүлдірді?
Айдана Қалыбай ішкі істер органдарында 2013 жылдан бері жұмыс істеген. Бұрынғы сұхбаттарында ол бала кезінен полиция қызметкері болуды армандап, жеті жылда капитан шеніне дейін көтерілгенін мақтанышпен айтқан еді. Кейін майор атағын алған.
Сот деректеріне сәйкес, Қалыбай әкімшілік полицияда қызмет атқара жүріп, жол ережесін бұзғандарға салынған айыппұлдарды заңсыз түрде басқа азаматтардың атына аударып отырған. Бұл әрекеттері мемлекетке 3,6 млн теңгеден астам залал келтірген. Қылмыстық іс бойынша 10 адам жәбірленуші деп танылды.
Сот шешімі не дейді?
Сот шешімімен Қалыбайдан мемлекет кірісіне 408 мың теңгеден астам сот шығыны және Жәбірленушілерге өтемақы төлеу қорына 69 мың теңге өндірілді.
Сотталушының жалғызбасты ана екені ескеріліп, жазасын өтеу мерзімі 2029 жылдың 23 тамызына дейін шегерілді. Осы уақытқа дейін ол үйқамақта болады. Егер қоғамдық тәртіпті бұзса немесе қадағалау органының ескертулеріне құлақ аспаса, жазасын өтеу үшін қамауға жіберіледі.
Айдана Қалыбай бұған дейін полицияда жоғары шенге жетіп, зейнетке дейін қызмет етуді армандаған. Алайда сот үкіміне сәйкес, ол "полиция майоры" арнайы атағынан айырылды.
Қазіргі уақытта оның ісіне байланысты қосымша тексерулер мен сұраулар жүргізіліп жатыр.