Ұлы Отан соғысындағы Жеңістің 80 жылдығына арналған әскери парадқа дайындық аясында 13 наурыздан бастап жеке құрамды тасымалдау және әскери техниканың қозғалысы басталады. Әскерилерді жеткізу және техниканы көшіру теміржол арқылы да, өз жүрісімен де жүзеге асырылады. Бұл туралы Aqshamnews.kz сайты хабарлайды.
Осыған байланысты еліміздің кейбір аймақтарындағы жолдардың жекелеген учаскелерінде көлік қозғалысына уақытша шектеулер енгізілуі мүмкін. Азаматтарға сапарларын алдын ала жоспарлап, жол қозғалысы ережелерін сақтауға кеңес беріледі.
Сонымен қатар, 2025 жылғы 22 сәуір мен 7 мамыр аралығында әскери авиацияның жаттығу ұшуларын өткізу үшін Астана қаласының әуе кеңістігіне қысқа мерзімді шектеулер қойылады. Бұл әуе рейстерінің кестесіне әсер етуі мүмкін, сондықтан жолаушыларға рейстер туралы ақпаратты алдын ала нақтылап алуға кеңес беріледі.
Ресми органдар енгізілген шектеулерге түсіністікпен қарауды, жалған ақпарат таратпауға және тек ресми дереккөздерге жүгінуді сұрайды.