Елордада 22 тамыз күні жастарға арналған еліміздегі ең ауқымды бос жұмыс орындары жәрмеңкесі өтеді. Іс-шара Жұмысшы мамандықтары жылы аясында ұйымдастырылып отыр.
Жәрмеңке «AMANAT» партиясының «Жастар Рухы» жастар қанаты мен Астана қаласы әкімдігінің қолдауымен өтеді. Ұйымдастырушылардың айтуынша, негізгі мақсат – жастарға лайықты жұмыс табуға мүмкіндік жасау, олардың кәсіби әлеуетін дамыту және елдің адами капиталын арттыру.
Шара Е. Рахмадиев атындағы мемлекеттік академиялық филармония ғимаратында (Кенесары көшесі, 32) өтпек.
Жәрмеңке жастар мен жұмыс берушілердің тікелей диалог алаңына айналып, еңбек нарығындағы жаңа мүмкіндіктерді ашады. Мұнда 70-тен астам ірі жұмыс беруші 1000-нан аса бос жұмыс орнын ұсынады.
Қатысушылардың арасында еліміздің жетекші компаниялары бар. Атап айтқанда:
- «KEGOC» АҚ,
- «Қазақтелеком» АҚ,
- «DAR RAIL» ЖШС,
- «Home Credit Bank» АҚ,
- «Қазмедиа орталығы» АҚ,
- «Богатырь Көмір» ЖШС,
- «Қазпошта» АҚ,
- Қазақстан Халық Банкі» АҚ,
- Astana Hub және басқа да ұйымдар.
Ұйымдастырушылардың пікірінше, жәрмеңкенің өткізілуі жүздеген жас қазақстандықты жұмыспен қамтуға жол ашады. Сонымен қатар, бұл шара жұмысшы мамандықтарының мәртебесін арттыруға, бәсекеге қабілетті ұрпақ тәрбиелеуге және ел экономикасын дамытуға ықпал етпек.