Бүгін – психологтардың кәсіби мерекесі. Бұл күн адам жанының саулығын сақтауға, қоғамдағы рухани тұрақтылықты нығайтуға үлес қосып жүрген мамандардың еңбегін бағалауға арналған. Аталған сала өкілдерімен қатар, әскери ортада қызмет ететін психологтардың рөлі де ерекше. Олар жеке құрамның моральдық-психологиялық ахуалын қамтамасыз етіп, қызметтік міндеттердің сапалы орындалуына ықпал етеді.
Ұлттық ұланның «Оңтүстік» өңірлік қолбасшылығында қызмет атқаратын подполковник Альмира Құрманәлиева – осы бағыттағы кәсіби мамандардың бірі. Ол жиырма жылдан астам уақыт бойы әскери қызметте жүріп, психологиялық қамтамасыз ету саласында мол тәжірибе жинақтаған офицер.
Әскердегі психологтың қызметі жеке құрамның моральдық-психологиялық тұрақтылығын сақтауға, ұжымдағы өзара сенімді нығайтуға және әскери қызметшілердің стреске төзімділігін арттыруға бағытталған. Жүйелі түрде жүргізілетін психологиялық жұмыстар жауынгерлік даярлықтың деңгейіне және қызметтік міндеттердің тиімді орындалуына тікелей әсер етеді.
Өз қызметі туралы Альмира Бірлікқызы:
"Біздің негізгі міндетіміз – әскери қызметшілердің психологиялық дайындығын арттыру, стреске төзімділігін қалыптастыру, қиын жағдайда дұрыс шешім қабылдау қабілетін дамыту. Жеке әңгімелер мен топтық тренингтер арқылы эмоционалдық жағдайды бақылап, психологиялық қолдау көрсетеміз. Сонымен қатар, жауынгерлік қызметтен кейінгі бейімделу, оңалту жұмыстары мен отбасы мәселелері бойынша кеңес беру де қызметіміздің маңызды бөлігі. Әскерде тәртіп пен жауапкершілік бірінші орында, ал Ұлттық ұланда қызмет ету – мен үшін үлкен мәртебе", – дейді ол.
Альмира Құрманәлиева әскери қызмет жолын 22 жасында бастаған. Алғашында 7552 әскери бөлімінде аудармашы болып еңбек етіп, кейін Алматы құрамасының басқармасына мемлекеттік тілді енгізу жөніндегі маман ретінде ауыстырылды. Қызметін жалғастыра жүріп, Қазақ Мемлекеттік қыздар педагогикалық институтында психология мамандығы бойынша екінші жоғары білім алды. Әскери психология саласы енді қалыптасып жатқан кезеңде ол жаңа бағыттағы қызметті үлкен жауапкершілікпен игеріп, кәсіби тұрғыда қалыптасты.
Бүгінде подполковник Альмира Құрманәлиева өзінің лауазымдық міндеттерін адал атқарып, жеке құрамның психологиялық тұрақтылығын қамтамасыз етуге тұрақты үлес қосып келеді. Оның қызмет жолы кәсібилікке, жауапкершілікке және әскери борышқа адалдыққа негізделген.