Елімізде «Ардагерлердің волейбол федерациясы» республикалық қоғамдық бірлестігі бар. Біраздан бері жұмыс істеп келеді. Оның құрамындағы Алматы филиалы да қалалық, облыстық, республикалық және халықаралық түрлі байқауларда топ жарып жүр, – деп хабарлайды aqshamnews.kz тілшісі.
Жалпы, ардагер волейболшылар федерациясының басты мақсаты – волейбол спортын аға буын спортшылар арасында кеңінен насихаттау, олардың да уақытын тиімді өткізуіне, спортпен айналысуына мүмкіндік туғызу, сондай-ақ салауатты өмір салтын, бұқаралық спортты дәріптеу, сол арқылы ардагерлердің өзара достық қарым-қатынасын нығайту.
Құрамында кәсіпкер, әскери маман, профессор, генерал, дәрігер, еңбек адамы да бар Қазақстанның «Номад» ардагер волейболшылар құрамасы жуырда БАӘ-нің астанасы Абу-Дабиде өткен Open Masters Games халықарлық жарысында бірінші орын алып келді. Олар 55+ категориясында бақ сынағандар.
Ал Қазақстан құрама командасының сапындағы 65+ категориясы бойынша ойнаған тоғыз ойыншының төртеуі алматылық, яғни Тілеуқабыл Сахипов, Ғайнидин Меманов, Александр Пархоменко және Ғизатолла Жайтеміров. «Ардагерлердің волейбол федерациясы» республикалық қоғамдық бірлестігі Алматы қаласы филиалының директоры Амра Шалбарбаев бапкерлік еткен бұл команда Моңғолия құрамасынан кейінгі екінші жүлделі орынды қанжығасына байлады.
«Біздің ардагерлер классикалық волейболда да, жағажай волейболында да тамаша ойын өрнегін көрсетті. Біз 65+ категориясында екінші орынды иеленген болсақ, 55+ категориясындағы мықтыларымыз бірінші тұғырға көтерілді. Жасы жетпістен асқан ақсақалдарымыздың өзі Ресей, Польша командаларымен тартысты ойнады. Олар әлі де аттан түсе қоймайтындарын, әлі де болса спортпен қоштасудың ерте екенін тағы бір дәлелдеді десек болады. Бұл ардагерлеріміздің өздерінің сонау жастық шақтан серік болып келе жатқан хоббиіне деген құштарлығының, адалдығының тағы бір дәлелі. Осы жетістігіміз кейінгі ұрпаққа сөзсіз тәрбие, үлгі. Осындай жарыс келесі жылы Италияда өтеді. Одан да қалмаймыз деп отырмыз», – дейді «Ардагерлердің волейбол федерациясы» республикалық қоғамдық бірлестігі Алматы қаласы филиалының мүшесі Тілеуқабыл Сахипов.