Ақтөбе қаласының Алматы ауданында құс фабрикасы аумағында өрт шықты, – деп хабарлайды aqshamnews.kz тілшісі Төтенше жағдайлар министрлігінің баспасөз қызметіне сілтеме жасап.
Өрт Жарық тұрғын алабында орналасқан, жұмыртқа сақтауға арналған бір қабатты бөлек тұрған қоймада болған. Өрт кезінде қоймада тек картон өнімдері ғана болған, тауық та, жұмыртқа да сақталмаған.
«Өрт 600 шаршы метр аумақта толық сөндірілді. Қабылданған шаралар нәтижесінде жалынның жанындағы қойма ғимаратына таралуына жол берілмеді», – делінген хабарламада.
Өртті сөндіру барысында ғимарат ішінен екі газ баллоны сыртқа шығарылып, ықтимал жарылыстың алдын алуға мүмкіндік берді.
Абырой болғанда, зардап шеккендер жоқ. Өрттің шығу себептері құзырлы органдар тарапынан анықталып жатыр.