Ақтөбеде жасөспірімдер арасындағы төбелес кезінде көзінен ауыр жарақат алған Тамерлан Мырзабайдың туыстары тергеуді қайта жүргізуді талап етіп отыр, деп хабарлайды Аqshamnews.kz тілшісі "Седьмой каналға" сілтеме жасап.
Түнде болған жанжал бейнебақылау камерасына түсіп қалған. Кадрларда Тамерланның құрдастарынан қорғанып жатқан сәті көрінеді. Бір мезетте оның бетіне қатты соққы тиіп, көзілдірігі шағылып кетеді. Шыны сынығы көз жанарына кіріп кеткен.
Тамерлан бұрын джиу-джитсумен айналысқан спортшы болған. Алайда жарақаттан кейін ол жарыстарға қатыспақ түгілі, күн сәулесіне тура қарай алмай қалған.
Туыстарының айтуынша, ол денсаулығына байланысты сабақтан да қол үзіп отыр. Алда оны ұзақ оңалту кезеңі мен ота күтіп тұр.
Бастапқыда іс екі бап бойынша"Бұзақылық" және "Орташа ауырлықтағы дене жарақатын келтіру" тергелген. Алайда кейін полиция "Бұзақылық" бабын жауып тастаған. Жәбірленушінің жақындары енді істің екінші бөлігі де жеңіл бапқа ауысып кетпей ме деп алаңдаулы екенін айтты.