Ақтөбе облыстық кәмелетке толмағандардың істері жөніндегі мамандандырылған ауданаралық соты Темір ауданында 9-сынып оқушысының қазасына байланысты қылмыстық істі қарады, деп хабарлайды Аqshamnews.kz тілшісі. Бұл туралы облыстық соттардың баспасөз қызметі хабарлады.
Сот материалдарына сәйкес, 2024 жылдың қыркүйегінде Темір ауданында 10-11 сынып оқушылары 9-сынып оқушыларына «құрметсіздік көрсетті» деген себеппен шабуыл жасаған. Соққы салдарынан 9-сынып оқушысы оқиға орнында көз жұмды.
Сот барысында кәмелетке толмаған айыпталушылар өз кінәсін ішінара мойындап, өкініш білдірді. Үкім шығару кезінде олардың жасы жеңілдететін мән-жай ретінде ескерілді, ал «Б», «Т», «Ж», «Ж-1» және «Қ»-ның қылмысты ұйымдастырудағы белсенді рөлі ауырлататын жағдай деп танылды.
Үкімге сәйкес:
-
«Б» және «Т» — ҚР Қылмыстық кодексінің 293-бабы 2-бөлігі 1,3-тармақтары және 28-бабы 3-бөлігі, 106-бабы 3-бөлігі бойынша кінәлі деп танылып, 6 жыл 8 айға бас бостандығынан айырылды. Сонымен қатар, кәмелетке толмаған «Т»-ның заңды өкілінен жәбірленуші тарапқа моральдық зиян өтемі ретінде 5 млн теңге өндірілді.
-
«М» — ҚР ҚК 106-бабы 3-бөлігі бойынша кінәлі деп танылып, 6 жыл 8 айға бас бостандығынан айырылды.
-
«Қ», «Ж» және «Ж-1» — ҚР ҚК 293-бабы 2-бөлігі 1,3-тармақтары бойынша кінәлі деп танылып, 1 жылға бостандығын шектеу жазасына кесілді. Ал ҚК 28-бабы 3-бөлігі мен 106-бабы 3-бөлігі бойынша кінәлілігі дәлелденбегендіктен, олар ақталды.
