Ақтауда «МАЭК» ЖШС-нің екі қызметкері №1 цехта тұз қышқылы ерітіндісімен жұмыс істеу кезінде күйік алды, деп хабарлайды Aqshamnews.kz тілшісі «Ақ Жайыққа» сілтеме жасап.
Маңғыстау облысының мемлекеттік еңбек инспекциясы департаментінің мәліметінше, оқиға 23 сәуір күні сағат 10:30-да №1 цехта болған.
Алдын ала дерек бойынша, қызметкерлер негізгі конденсаторды қышқылмен шаю жұмыстарын жүргізген. Тұз қышқылы ерітіндісі сорғы арқылы шлангпен берілген. Жұмыс аяқталып, жабдық өшірілгеннен кейін шлангты ажырату кезінде ерітінді атқылап не шашырап кеткен. Салдарынан қышқыл тамшылары жұмысшылардың беті мен көзіне тиген.
Зардап шеккендер медициналық көмек көрсету үшін Маңғыстау облыстық ауруханасына жеткізілді.
Еңбек инспекциясының хабарлауынша, жұмыс беруші жазатайым оқиға туралы ведомствоға белгіленген тәртіппен хабарлаған.
Қазір жарақаттың ауырлық деңгейі туралы медициналық қорытынды күтіліп отыр. Егер ауыр немесе топтық жазатайым оқиға белгілері анықталса, тергеу мемлекеттік еңбек инспекторының қатысуымен арнайы тәртіпте жүргізіледі.
Оқиғаның мән-жайы анықталып жатыр