Ақмола облысы Бұланды ауданындағы Макинск қаласында өрт сөндірушілер көпқабатты үйдегі түтінге толған пәтерден екі баланы аман алып шықты, деп хабарлайды Aqshamnews.kz тілшісі.
Төтенше жағдайлар министрлігінің мәліметінше, өртті кезекшілік кезінде өрт сөндіру бөлімінің қызметкерлері өздері байқап қалған. Олар жақын маңдағы көпқабатты тұрғын үйдің бесінші қабатынан жалын шыққанын көріп, ресми шақыртуды күтпей-ақ бірден оқиға орнына барған.
Белгілі болғандай, өрт пешке қойылған тамақтың жанып кетуінен шыққан. Үйде ересектердің қарауынсыз қалған екі кәмелетке толмаған бала пешке кастрөл қойып, кейін ұйықтап кеткен. Соның салдарынан тамақ күйіп, ашық жалын тұтанып, пәтер іші қою түтінге толған.
Құтқарушылар өртті қолда бар құралдардың көмегімен жедел сөндіріп, түтінге толған пәтерден екі баланы қауіпсіз жерге эвакуациялаған. Сонымен қатар үйдің тағы 25 тұрғыны қауіпті аймақтан өз бетімен шығып үлгерген.
Төтенше жағдайлар министрлігі тұрғындарға өрт қауіпсіздігі талаптарын сақтауды және балаларды қараусыз қалдырмауды ескертті.