Ақмола облысында бұрынғы сыныптасына пышақпен шабуыл жасады деген күдікпен жігіт ұсталды, деп хабарлайды Aqshamnews.kz тілшісі.
Полиция мәліметінше, 24 сәуір күні Макинск қаласының медициналық мекемесіне пышақ жарақаттарымен 18 жастағы жергілікті тұрғын жеткізілген. Аталған дерек бойынша қылмыстық іс қозғалды.
Күдікті ретінде жәбірленушінің бұрынғы сыныптасы ұсталып, уақытша ұстау изоляторына қамалды. Қазіргі уақытта оқиғаның барлық мән-жайын жан-жақты анықтауға бағытталған тергеу әрекеттері жүргізіліп жатыр.
Тергеу барысы облыстық полиция департаменті басшылығының бақылауында. ҚР ҚПК-нің 201-бабына сәйкес өзге ақпарат жарияланбайды.
Алдын ала мәліметтерге сәйкес, оқиға стадионда волейбол ойыны кезінде болған. Бетперде таққан жас жігіт келіп, 11-сынып оқушысының көзіне бұрыш газы шашып, кейін мойны мен іш тұсынан бірнеше рет пышақ жарақатын салған. Одан кейін күдікті оқиға орнынан кетіп қалған.