Мемлекет басшысы Қасым-Жомарт Тоқаев Бурабайда өткен кешегі Ұлттық құрылтайда кино болсын, мультфильм болсын, екеуі де нағыз идеологиялық құрал екенін атап өтті.
Бірақ алдымен санға емес, сапаға көңіл аудару керектігін баса айтты. Себебі, зорлық-зомбылықты, қатыгездік пен қылмысты насихаттайтын фильмдер пайда болды деді Президент. Сондықтан осы бағытта жүрген әріптестерге жауапкершілік жүгі артылып тұрғаны анық.
Мемлекет басшысы қазақша, ұлттық нақышта түсірілген мультфильмдер көп болуы қажет деді сосын. Сондай-ақ анимацияны дамыту мәселесін қолға алу керек екенін тілге тиек етті. Біз, қызым - жас режиссер-аниматор Маржан Жұбаныш екеуміз бірнеше жылдан бері ұлттық анимацияның көсегесі көгерсе екен деп тынбай еңбек етіп келеміз.
Енді мемлекеттік деңгейде көңіл бөлінетін болса, бұл жаңалық бізге екі есе шабыт сыйлайтыны анық. Бұған дейін “Бәс”, “Шаңырақтың иесін іздеп жүрмін”, “Балалы үй - базар”, “Сауға”, “Қошақан” атты мультфильмдерімізді кішкентай көрермендер жылы қабылдаған-ды.
Президент айтқан ұлт болашағына тікелей ықпал ететін балалар контентін көбейту жолындағы жұмысымыз одан әрі күш алатын шығар енді деп көңіліміз аспандап қалды.
Үміт ЖҰБАНЫШ, суретші-безендіруші, Қазақстан Суретшілер одағы мен Кинематографистер одағының мүшесі