Алматыда алты баланы тәрбиелеп отырған Арман Біләл мен Жанар Сейілбекованың отбасы биыл «Мерейлі отбасы – 2026» ұлттық байқауының қалалық кезеңінде үздік атанды. Биыл байқауға Алматыдан 262 отбасы қатысқан.
Отағасы Арман Біләл есепші болып еңбек етеді. Ал жары Жанар Сейілбекова – қолөнер шебері әрі алты баланың анасы, «Күміс алқа» иегері. Бұл шаңырақта бала тәрбиесінде еңбекқорлыққа, жауапкершілікке, ұлттық құндылық пен салт-дәстүрге ерекше мән беріледі. Балалары да спортпен айналысып, түрлі жарыстарда жүлде алып жүр.
Біләловтер үшін ұлттық тәрбие тек сөзбен айтылатын ұғым емес. Отбасы балаларын қолөнерге баулып, қазақтың дәстүрлі өнерін бірге дәріптеп келеді. Олардың «Жылдың төрт мезгілін бейнелейтін сырлы сырмақ» атты жұмысы 112 метрге жетіп, Global Book of Records рекордтар кітабына енген. Сондай-ақ Наурыз мерекесінде «Биік, алып, киелі – Шаңырақ» этномәдени композициясын көпшілікке ұсынған.
– Біздің басты мақсатымыз – ата-бабадан қалған ұлттық құндылықтарды сақтап, кейінгі ұрпаққа жеткізу, – дейді отбасы мүшелері.
Алты балалы шаңырақтың өнегесі отбасының берекесі тек бала санымен емес, сол балаларға берілетін тәрбие, ортақ еңбек пен бір-біріне деген қолдаумен өлшенетінін көрсетеді.
Айта кетейік, Біләловтер отбасы енді Алматы атынан «Мерейлі отбасы» байқауының республикалық кезеңіне қатысады.