Қалалық әкімшіліктің қолдауымен 2012 жылдан бері дәстүрге айналған «Үздік педагог» байқауы биыл оныншы рет өткізіліп отыр.
Алайда, әлемдік індетке байланысты екі кезеңнен тұратын дәстүрлі «Үздік педагог» байқауы онлайн режимінде өткізілді, деп хабарлайды Almaty-akshamy.kz
Аталмыш байқаудың басты мақсаты педагог мәртебесін көтеріп, білім беру саласында жоғары жетістіктерге жеткен педагогтерді анықтап, олардың еңбегін бағалау. Сондықтан, байқауға қатысып, бағын сынағысы келгендер саны өте көп болды.
Биыл байқауға 189 мектепке дейінгі тәрбие мен оқыту ұйымдарынан – 76 тәрбиеші мен 207 орта білім беру ұйымдарынан – 88 мұғалім, 21 колледжден 21 педагог байқауға қатысуға ниет білдірді.
Алғашқы кезеңге қатысқан 185 педагогтің 17-і қалалық кезеңге жолдама алды.
Конкурстың қазылар алқасының құрамында педагогикалық жоғары оқу орындарының ғалымдарынан, педагогтердің қалалық «Ұстаз» кәсіподақ ұйымының төрағасы, өнеркәсіпшілер және жұмыс берушілер одағының басшылығы, тәжірибелі педагогтер «Үздік педагог» байқауларының жеңімпаздарынан және бұқаралық ақпарат құралдарының өкілдері болды.
Қалалық конкурстың қорытындысы бойынша балабақшалардан, мектептерден және колледждерден қатысқан педагог қызметкерлерге I, II, III орындар анықталды:
- I орын – 1 мұғалім, 1 арнайы пәндер оқытушысы;
- II орын – 1 мұғалім, 1 тәрбиеші;
- III орын –3 мұғалім, 2 тәрбиеші.
Жеңімпаздардың есімдері педагог қызметкерлердің тамыз конференциясында жария болып, марапатталатын болады.
Конкурста I орын алған екі педагогке «Үздік педагог» атағы беріледі.
Сонымен қатар, I орын алған екі «Үздік педагог» иегеріне жергілікті бюджет есебінен айлық есептік көрсеткіштің 300 еселенген мөлшерінде сыйақы төленеді.