Алматы қалалық Ревматология орталығында Дүниежүзілік артритпен күрес күніне орай «Ашық есік» ұйымдастырылды, – деп хабарлайды aqshamnews.kz тілшісі.
Іс-шараның негізгі мақсаты – ревматологиялық аурулардың алдын алу, оларды ерте диагностикалаудың маңыздылығын түсіндіру, халықтың денсаулыққа деген жауапкершілігін арттыру және тұрғындарға білікті медициналық көмек көрсету.
«Ашық есік» күні аясында орталыққа келген тұрғындар ревматолог-дәрігерлердің кеңесін алып, өздерін мазалаған сұрақтарға жауап алды. Мамандар буын ауруларының алғашқы белгілеріне назар аударудың, дер кезінде дәрігерге қаралудың және қажетті тексерулерден өтудің маңыздылығын атап өтті.
– Артрит – буындардың қабынуымен сипатталатын аурулар тобы. Оның кейбір түрлері адамның қозғалыс белсенділігін шектеп, өмір сапасына кері әсер етуі мүмкін. Әсіресе, ревматоидты артрит кезінде ауруды ерте анықтап, емдеуді уақытында бастау маңызды. Бұл буындардың зақымдану қаупін азайтып, аурудың асқынуының алдын алуға көмектеседі, – дейді ревматолог-дәрігер, PhD Гүлжан Тримова.
Мамандардың айтуынша, буындардың ұзақ уақыт ауыруы, ісінуі, таңертеңгілік сіресуі және қозғалыстың шектелуі сияқты белгілерге бейжай қарауға болмайды. Мұндай жағдайларда өздігінен емделмей, дәрігердің көмегіне жүгіну қажет.
Алматы қалалық Ревматология орталығы мұндай «Ашық есік» күндерін жылына екі-үш рет ұйымдастырып отырады. Денсаулықты сақтау – дер кезінде жасалған қадамнан басталады.
Нұржамал ӘЛІШ