Алматының Орталық стадионына реконструкция жасалады – қала әкімі
Орталық коммуникациялар қызметіндегі брифинг барысында Алматы әкімі Ерболат Досаев «Челси» футбол клубымен өткен матчтан кейін мегаполистің халықаралық беделіне қатысты журналистердің сұрақтарына жауап берді, деп хабарлайды aqshamnews.kz
Әкімнің айтуынша, УЕФА конференциялар лигасы аясында 12 желтоқсанда «Астана» мен «Челси» арасында өткен матчқа шамамен 21 мың адам қатысқан.
«Естеріңізде болса, біз кешірім сұрадық. Матч басталғанға дейін стадионның шығыс секторындағы алты қатардың аралығы дер кезінде тазаланбаған. Бұл Орталық стадион менеджментінің жұмысты толық атқармағанын көрсетеді, сондықтан тиісті шаралар қабылданды», – деді Ерболат Досаев.
Ол бұл жағдайдан тиісті қорытынды жасалғанын, бірақ бұл оқиға ойын сапасына әсер етпегенін, әрі ағылшын командасы немесе УЕФА тарапынан шағым түспегенін атап өтті.
«Келесі жылы біз Орталық стадионды қайта жаңғыртуды бастаймыз. Орын саны 32 мыңға дейін ұлғайтылады. Жаңа стадион барлық стандарттарға сай болады және жабық форматта салынады. Бүгінде жаңа жүйе бойынша ЕРС-келісімшарты («толық аяқтау») аясындағы даму тұжырымдамасы бекітілді. Бұл алаңда еуропалық және әлемдік деңгейдегі жоғары дәрежелі кубоктық жарыстарды өткізуге мүмкіндік болады. Сонымен қатар, мен стадион басшылығына сапалы жұмыс жүргізу үшін қосымша компанияларды тарту қажеттігін тапсырдым», – деді әкім