Төтенше жағдай туындаған кезде мектеп қызметкерлері мен күзет қызметі жедел әрі нақты әрекет етуге дайын болуы тиіс, деп хабарлайды aqshamnews.kz тілшісі.
Жаңа оқу жылы қарсаңында Алматы қаласы полиция департаментінің бастығы, полиция генерал-майоры Айдын Кабдулдинов жалпы білім беретін мектептердің дайындығын тексерді.
Жұмыс сапары барысында ол Бостандық ауданындағы бірқатар мектепке барып, білім беру нысандарындағы қауіпсіздік шараларының ұйымдастырылуымен және оқушыларды қабылдауға дайындығымен танысты.
Тексеру кезінде мектептердің инженерлік-техникалық тұрғыдан қорғалуына, өткізу режимінің ұйымдастырылуына, дабыл түймелері мен бейнебақылау жүйелерінің жұмыс істеуіне, сондай-ақ күзеттің сапасына ерекше назар аударылды.
Департамент бастығы балалардың қауіпсіздігін қамтамасыз етуде формалды көзқарасқа жол бермеу керектігін атап өтті. Оның айтуынша, төтенше жағдай туындаған кезде мектеп қызметкерлері мен күзет қызметі жедел әрі нақты әрекет етуге дайын болуы тиіс.
«Балалардың қауіпсіздігіне қатысты мәселеге формалды түрде қарауға болмайды. Мектепте кіріп-шығуды бақылаудан бастап, дабыл түймесінің жарамдылығы мен кәсіби күзет қызметінің жұмысына дейінгі қауіпсіздік шаралары толық жолға қойылуы қажет. Кезекшілікте тұрған қызметкер балалардың қауіпсіздігін қамтамасыз етіп, кез келген қауіп-қатерге жедел әрекет ете алатынына сенімді болуымыз керек», – деді Айдын Кабдулдинов.
Сонымен қатар тексеру барысында мектептерге іргелес аумақтардағы көше-жол желісінің жай-күйі де қаралды. Атап айтқанда, жол белгілерінің болуы мен жарамдылығы, жол таңбаларының жағдайы, жаяу жүргіншілер өткелдері, көлік қозғалысын ұйымдастыру және білім беру ұйымдарына кіріп-шығу жолдарындағы балалардың қауіпсіздігі назарға алынды.
Баланың қауіпсіздігі мектеп табалдырығын аттаған сәттен емес, оған дейін басталады. Сондықтан қауіпсіз маршрут, реттелген кіріп-шығу тәртібі және білім беру ұйымында балаларды қорғауға қажетті жағдайлардың жасалуы – ата-аналардың алаңсыздығы мен балалардың қауіпсіздігінің маңызды кепілі.