Қалалық полиция департаментінің бастығы Арыстанғани Заппаров Б.Атыханұлы атындағы №36 мектеп-гимназиясының оқушыларын Білім күнімен құттықтады, деп хабарлайды Almaty-akshamy.kz Polisia.kz-ке сілтеме жасап.
«Бірінші қыркүйек – күздің ең мейірімді және ең жарқын мерекелерінің бірі. Бірінші сынып оқушылары үшін бұл өмірдегі жаңа кезеңнің басталуы, білім мен жетістіктер жолындағы алғашқы қадамдар. Олар үшін бүгін алғашқы қоңыраумен бірге қызықты жаңалықтар мен жарқын әсерлерге толы жаңа, үлкен әлемнің есіктері айқара ашылады. Жоғары сынып оқушылары үшін бұл жаңа биік мақсаттар қойып, оларға қол жеткізу мүмкіндігі», – деді Арыстанғани Заппаров.
Алматы полициясының басшысы бірінші сынып оқушылары үшін қауіпсіздік бойынша алғашқы сабақ өткізді.
«Балалар – біздің болашағымыз, сондықтан олардың өмірі мен денсаулығына ештеңе қауіп төндірмеуі өте маңызды. Полицейлер тұрақты негізде мұғалімдермен кездесулер өткізеді, онда мектеп оқушыларының оқу процесі кезіндегі қауіпсіздік мәселелерін бірлесіп шешеді. Мұндай тығыз және жақсы үйлестірілген өзара іс-қимыл, біздің ойымызша, балалардың жол-көлік жарақатын азайтуға және мектептердегі балалардың қауіпсіздігін қамтамасыз етуге өте тиімді», – деді Арыстанғани Заппаров.
Сонымен қатар Алматы қалалық ПД-ның басшысы баланы жастайынан өмірге жетелеп, оның тұлғасын қалыптастырып, әлеуетін ашып, маңызды білімдерін шәкірттеріне беріп, сондай-ақ, оларды Отанды сүюге, жауапкершілік пен еңбекқорлыққа тәрбиелейтін ұстаздарға алғысын білдірді.