Декоративті жарықтандыру және қасбеттерді жөндеу: биыл Алматының Әуезов ауданында не істеледі
Әуезов ауданының тұрғындарымен кездесу барысында Алматы әкімі Ерболат Досаев ауданның тұрғын үй-коммуналдық инфрақұрылымын жаңғырту және жақсарту бойынша қабылданып жатқан шаралар туралы айтты, деп хабарлайды aqshamnews.kz
Әкімнің айтуынша, 2024 жылы 36 тұрғын үйдің қасбетіне декоративті жарықтандыру орнатылып, 28 үйдің қасбеті ағымдағы жөндеуден өтті. 2025 жылы 42 үйдің қасбетіне декоративті жарықтандыру орнатылып, 12 үйдің қасбеті ағымдағы жөндеуден өтеді деп жоспарланған.
«Тұрғындардың қауіпсіздігі мен жайлы өмір сүру шарттарын қамтамасыз ету үшін 2024 жылы 39 көпқабатты тұрғын үйге күрделі жөндеу жүргізіліп, 20 көпқабатты үйде 30 жеделсаты ауыстырылды. 2025 жылы 45 көпқабатты тұрғын үйге күрделі жөндеу жүргізіліп, 32 көпқабатты үйде 34 жеделсаты ауыстыру жоспарлануда», – деді Алматы әкімі.
Айта кетейік, Ерболат Досаевтың тапсырмасымен 2022-2024 жылдар аралығында қалада 355 үйдің қасбеті жөнделген болатын. Жалпы, 2025-2026 жылдары тағы 296 қасбетіне жөндеу жоспарланған. Бұл шаралар қала көркін жақсартуға бағытталған.