Алматыда қызмет ететін патрульдік полиция қызметкері Мерей Сәрсебек өзінің кәсібилігі, сыпайылығы және адамгершілігімен қала тұрғындарының ризашылығына бөленіп жүр. Оның зейінді жұмысы мен адал қызметі әлеуметтік желіде ерекше талқыланып, алғыстар айтылуда.
Мерей Сәрсебек Ішкі істер органдарында 2020 жылдан бері жұмыс істеп келеді, қазіргі уақытта взвод командирі болып табылады. Оның жоғары кәсібилігі мен адалдығы жас мамандарға үлгі болуда. Қазіргі таңда ол өз тәжірибесін жас полицейлерге үйретіп, азаматтарды қорғау ісінде тәлімгер ретінде қызмет етуде.
Алматы қалалық ПД жергілікті полиция қызметі басқармасының басшысы Серік Шумаев Мерейдің бұл қасиеттерін ІІМ-нің ардагері болған әкесінен үйренгеніне сенімді екенін атап өтті.
Жаңа жыл түні Мерей Сәрсебек көптеген әріптестері сияқты қаладағы тәртіп пен қауіпсіздікті қамтамасыз ету үшін жұмыс орнында болады. Оның сөзінше, жұмыстағы жетістігінің сыры – сыпайылық, зейінділік, жауапкершілік және адамдарға құрметпен қарау.
"Ең бастысы – азаматтардың алғысын есту. Бұл – біздің жұмысымыздың негізгі мақсаты және менің жүрегімді жылытады," – деді Мерей Сәрсебек.