Өңірлік коммуникациялар қызметі біраз күн бұрын көпбалалы ана Гүлзира Сарсембаева туралы сюжет жасаған болатын. Бес баланы бір өзі асырап, бірнеше жерде жұмыс істеп жүрген осындай батыр анаға болысқысы келгендер көп ұзамай хабарласып, Гүлзираға көмектескісі келетінін айтқан.
Алғашқылардың бірі болып алматылық Ирина қоңырау шалды, - деп хабарлайды Aqshamnews.kz.
Істегенін дабыралатпай, артық ештеңе айтпай, Ирина азын-аулақ қаржы аударды. Сюжетті Линара деген кәсіпкер де көрген екен. Ол да үнсіз қалмауды жөн көріп, балаларға бастан-аян киім-кешек алып беретін болды.
Жаңа жылдың алдында бәрі бірге «Алматы моллға» барып, балаларға киім таңдады. Кәсіпкер киім ғана алып бермей, қаржылай көмек те берді.
Қала тұрғындарының сюжетке қолдау білдіргенін көріп, жанашыр да мейірімді жандар арамызда көп екеніне көзіміз жетті. Осындай игі іске ұйытқы болғанымызды мақтаныш етеміз.
Қиын жағдайға тап болған жандар туралы сюжетті Өңірлік коммуникациялар қызметі алда да жалғастырмақ ойда. Өйткені, мұндай көмекке мұқтаж адамдар әлі көп.