Алматылық спортшы Жәмилә Бақбергенова Тиранада (Албания) өткен әйелдер күресінен халықаралық рейтингтік турнирдің жеңімпазы атанды, – деп хабарлайды aqshamnews.kz тілшісі.
Алматы қаласы Спорт басқармасы өкілдерінің мәліметінше, спортшы 72 келіге дейінгі салмақ дәрежесінде бақ сынады. Финалда ол Қырғызстан өкілі Нұрзат Нұртаеваны 14:3 есебімен айқын басымдықпен жеңіп, турнир чемпионы атанды.
Финалға дейінгі белдесулерде Жәмилә Бақбергенова мықты дайындық деңгейін көрсетті. Алғашқы айналымда польшалық Виктория Чолуйді 4:3 есебімен тізе бүктірсе, кейін 2023 жылғы әлем чемпионы және 2024 жылғы Еуропа чемпионы, түркиялық Бусе Тосунды 6:1 есебімен жеңді. Жартылай финалда үндістандық Дикша Маликті 10:0 есебімен мерзімінен бұрын ұтты.
Осылайша, Жәмилә Бақбергенова Қазақстан құрамасының қоржынына халықаралық рейтингтік турнирдің алтын медалін салды.
