Алматылық құтқарушылар терезеден құлап кетуі мүмкін баланы аман алып қалды, – деп хабарлайды aqshamnews.kz тілшісі.
Алматының Алатау аданындағы Мәдениет ықшам ауданында алты қабатты тұрғын үйдің алтыншы қабатындағы пәтер терезесінде кішкентай баланың отырғаны және оның құлап кету қаупі бар екені туралы хабарлама түскен.
Оқиға орнына жедел жеткен құтқарушылар автосатының көмегімен ашық терезе маңында тұрған баланы құтқарып алды. Оқиға кезінде пәтердің есігі құлыптаулы болған, ал ата-анасы үйде болмаған.
Шамамен 5 жастағы құтқарылған бала полиция қызметкерлеріне тапсырылды.
Баланы құтқаруда СПЧ-19 бірінші қарауылының қызметкерлері ерекше рөл атқарды: аға өрт сөндіруші Нұрпейісов Сұлтан Серікұлы - азаматтық қорғау сержанты, азаматтық қорғау органдарында 6 жылдан бері қызмет етеді; Өрт сөндіру автосатысының аға нұсқаушысы Кенже Дәулет Нәсіпұлы - азаматтық қорғау старшинасы, 2016 жылдан бері азаматтық қорғау органдарында қызмет атқарады. Ол баланы құтқару үшін автосатының жебесін шеберлікпен көтерді. Құтқарушылардың кәсіби әрі үйлесімді әрекеттерінің арқасында қайғылы жағдайдың алдын алу мүмкін болды.
ТЖМ ата-аналарға ескертеді: кішкентай балаларды қараусыз қалдырмаңыздар және терезелерге арнайы қорғаныс құралдарын орнатыңыздар.