Жаратылыстану-математикалық бағыттағы пәндер бойынша республикалық олимпиаданың қорытындысы жарияланды
Жаратылыстану-математикалық бағыттағы пәндер бойынша республикалық олимпиаданың қорытындылары белгілі болды. Биыл зияткерлік сайыстың финалдық кезеңіне еліміздің түкпір-түкпірінен 955 үздік мектеп оқушысы өтті. Командалық есеп бойынша Алматы қаласының құрама командасы бірінші орынды иеленіп, «Үздік олимпиадалық команда» атағына ие болды, деп хабарлайды aqshamnews.kz
Олимпиаданың қорытындысы бойынша Гран-при NIS оқушыларына бұйырды. Бірінші орын Алматы қаласы мен елорда және Республикалық физика-математика мектебінің оқушыларына берілді. Екінші орынды Павлодар облысының командасы иеленсе, үшінші орынға Ақтөбе және Шығыс Қазақстан облыстарының оқушылары ие болды.
Олимпиада жеңімпаздарының бірі, Алматы қаласындағы №126 мамандандырылған лицейдің 11-сынып оқушысы Жан Шарханов өз әсерімен бөлісті.
«Мен үшін олимпиадаға қатысу – тек білімімді сынау мүмкіндігі ғана емес, сонымен қатар еліміздің әр өңірінен келген білімге құштар достармен танысуға үлкен жол ашты. Алматы командасының бір мүшесі болғаныма мақтанамын. Біз көп еңбектендік. Болашақта ғылыммен айналысуды армандаймын. Осындай олимпиадалар – сол арманға апарар алғашқы баспалдақ деп білемін», – деді Жан Шарханов.
Айта кетерлігі, Алматы қаласы математика және география пәндері бойынша республикалық олимпиаданың 325 қатысушысын қабылдады. Олимпиада екі кезеңнен тұрды: теориялық және далалық тур. Бірінші кезеңде оқушылар теориялық білімді тексеретін тапсырмаларды орындаса, екінші кезеңде күрделі есептер мен география пәні бойынша далалық зерттеу жұмыстарын жүргізді.
«Алматы тағы да жоғары дайындық деңгейін көрсетіп, командалық есепте бірінші орынды иеленді. Бұл жеңіс – оқушылар мен олардың ұстаздарының тынымсыз еңбегінің нәтижесі. Айта кету керек, Алматы құрамасы осы атақты қатарынан 23 жыл бойы сақтап келеді. Бұл – тұрақтылықтың, жүйелі жұмыстың және жоғары нәтижелердің жарқын көрінісі. Баршаңызды жеңіспен шын жүректен құттықтаймын, алдағы уақытта да сәттілік тілеймін!» – деді жеңімпаздарды марапаттау рәсімінде Алматы қаласы Білім басқармасының басшысы Сайран Сайфеденов.
Алматы қаласының намысын қорғаған оқушылар ҚР Оқу-ағарту министрлігінің I, II және III дәрежелі дипломдарымен, алтын, күміс және қола медальдармен, сондай-ақ бағалы сыйлықтармен марапатталды. Сонымен қатар, ерекше жетістіктері үшін екі оқушы ҚР Оқу-ағарту министрлігінің «Дарын» республикалық ғылыми-практикалық орталығының Құрмет грамоталарын иеленді.