1986 жылғы Желтоқсан оқиғасының қаһармандарын еске алу және Тәуелсіздік рухын жас ұрпақ бойына сіңіру мақсатында Алматының Алатау ауданындағы мектептерінің оқушылары арасында “Мәңгі оянған намыс” атты өнер байқауы ұйымдастырылған болатын. Ұйымдастырушылар – “Желтоқсан ақиқаты” республикалық қоғамдық бірлестігі, “Нұрлы шуақ” қоғамдық қоры, “Парасатты жастар” және “Халықаралық “Қазақ тілі” қоғамы” қоғамдық бірлестіктері.
”Байқаудың мақсаты – Желтоқсан қаһармандарының ерлігін насихаттау, өнер арқылы ұлттық құндылықтар мен Отанға деген сүйіспеншілікті арттыру, талантты оқушыларды анықтау және қолдау. Байқауға Алатау ауданындағы 20 мектептен 100-ден аса оқушы қатысып, іріктеу кезеңде 30 жеткіншектің бағы жанды. Жеңімпаздардың ешқайсысын бөліп-жармай, бәріне бағалы сыйлықтар табыстадық», – дейді “Желтоқсан ақиқаты” республикалық қоғамдық бірлестігінің төрағасы Болат Құрымбаев.
Байқаудың “Көркем сөз” жанрында балалар Тәуелсіздік және патриоттық тақырыбында шығарма жазды. “Вокал” номинациясында жанды дауыспен патриоттық әндер шырқады. “Ақындық өнерде” жеткіншектер авторлық өлеңін орындады. Ал “Бейнелеу өнері” жанрында Желтоқсан рухын, батырлар ерлігін, бейбіт өмірді бейнелейтін суреттерін ұсынды.
”Менің қызым Сезім Қанатбек N205 мектептің 5 “е” сыныбында оқиды. Ол бүгінгі байқауда “Бейнелеу өнері” номинациясының жеңімпазы атанды. Суретінде Бәйтеректі бейнелепті. Көкпеңбек аспан да маған әдемі әсер сыйлады. Жап-жасыл шөптің үстінде дастархан жайып, көңілді отырған отбасының бейнесі де жүрегімді тербеді. Қызымның осындай егемен елде, бақытты отбасында өмір сүріп жатқанына мың тәуба айтамын”, - дейді алматылық ата-ана Жадыра Қаракөзеева.
Байқаудың алғашқы іріктеу кезеңі онлайн форматта ұйымдастырылған болатын. Ал біз екінші шешуші кезеңіне, яғни мегаполистегі Оқушылардың инновациялық шығармашылық орталығында өткен, онлайн-сайыстан үздік деп танылған балалардың басы қосылған гала-концертіне қатыстық. Алатаулық өнерлі оқушылар концерт қойды. Мерейі үстем болған жас достар марапатталды. Барлық қатысушыға сертификат табысталды.
