Астанадағы Назарбаев Университетінде өткен ІІ Таланттар саммитінде Алматы қаласы Оқушылар сарайының жас зерттеушілері ғылыми-техникалық жобаларын ұсынды, деп хабарлайды Aqshamnews.kz.
Саммиттің негізгі мақсаты – дарынды оқушыларды анықтап, олардың халықаралық ғылыми және сарапшылық ортаға қадам басуына мүмкіндік жасау.
Алматылық оқушылардың жобаларын Қазақстан Республикасының Оқу-ағарту министрі Жұлдыз Сүлейменова мен «Сириус» федералды аумағының бас директоры Елена Шмелева бастаған сарапшылар комиссиясы бағалады. Мамандар жас зерттеушілердің ғылыми дайындығы мен зерттеуге деген қызығушылығын ерекше атап өтті.
Оқушылар бұл деңгейге жету үшін екі айдан астам уақыт бойы көпсатылы іріктеуден өтті. Осы кезеңде әр жобаның өзектілігі, техникалық шешімі мен өміршеңдігі сараптамадан өткізілді.
Саммитте мына жобалар таныстырылды: көлік кептелісін талдау, адам қадамынан электр энергиясын өндіретін еден панельдері, ұйқы бұзылыстарын зерттейтін Bio-Headband 1.0 және BioHeadbandAI боты, Hexa-Search іздестіруші робот-өрмекшісі, камерасы бар бионикалық көздер, ірі қалалардағы түтінді тазарту жүйесі және білім беру мекемелеріне арналған автоматтандырылған сейсмограф.
Ұйымдастырушылардың айтуынша, алматылық оқушылардың халықаралық сарапшылар алдында жобаларын сәтті қорғауы қаланың қосымша білім беру жүйесінің әлеуетін және жас таланттардың ғылыми ізденіске дайындығын көрсетті.