Алматы қаласы Жастар саясаты басқармасының қолдауымен «Дүйсенбілік спорт» жобасы шеңберінде «Social project management» орталығы» қоғамдық қорының ұйымдастыруымен NEET санатындағы жастар арасында үстел теннисінен турнир өтті.
Бұқаралық спортты дамыту және жастарды қолдау мақсатындағы аталмыш іс-шараға базарда, сауда орталықтарында жұмыс істейтін және жұмыссыз жүрген 30 жас бақ сынады.
Бұған дейін «Дүйсенбілік спорт» жобасы аясында алматылық базар жастарының арасында шағын футболдан турнир өткен болатын. Сайысқа түскендер арасында болашақта үлкен додаларда топ жаруды мақсат еткендер де бар.
Турнир Алматы қаласы Алатау ауданындағы ADD үстел теннисі орталығында өтті. Аталмыш іс-шараға «Қазына», «Арыстан», «Арлан», «Саламат», «Тиграхауд» т.б сауда орталықтарында жұмыс істейтін жігіттер мен жұмыссыз жастар қатысты.
Алғашқы іріктеу кезінде екі топқа бөлініп, өзара іріктеу ойындарын өткізді. Ширек финал мен жартылай финалдық сайысқа сүрінбей жеткен жастар арасындағы ойын тартысты өтті. Жарыс қорытындысында 1-орынды «Арыстан» базарының үстел теннисшілері иеленіп, 250 мың теңгенің сертификатын қанжығасына байлады. Ал 2-орын алған «Тиграхауд» базарының жастары 150 мың теңгенің сертификатын олжалады. Үшінші орынды «Жаңа Ялян», «Сарыарқа» базарының ойыншылары өзара бөлісіп, әрқайсысы 50 мың теңгенің сертификатын еншіледі.
Енді алдағы уақытта «Дүйсенбілік спорт» жобасы аясында NEET санатындағы жастар арасында баскетболдан, волейболдан кемінде 16 команданың, ал киберспорт бойынша 30 ойыншының қатысуымен турнир ұйымдастырылмақ.
Жеңімпаздарға ақшалай сертификаттар мен медаль, кубоктарды үстел теннисінен халықаралық спорт шебері Игорь Медведев табыс етті. Турнирге белгілі спорт шебері Алексей Тимченко төрелік жасады.