Нысана көздеуден Қазақстан командасы Париж Олимпиадасының қола жүлдегері атанды, деп хабарлайды Olympic.kz. 10 метрге нысана көздеуден аралас командалық сында Ислам Сәтпаев пен Александра Ле қола медаль жеңіп алды.
Кіші финалда Қазақстан командасы Германия құрамасынан 17:5 есебімен басым түсті. Бұл жеңіс мергендер үшін ұзақ үзілістен кейінгі алғашқы Олимпиада медалі болып табылады.
Қазақстан командасының бас бапкері Ольга Довгун.
Керек дерек
Александра Ле – 2004 жылы 3 мамырда Алматы қаласында дүниеге келген.
Қазақстан Республикасының нысана көздеуден халықаралық дәрежедегі спорт шебері. Алғашқы жаттықтырушысы Арман Оразбайұлы Айсенов болды. 2019 жылы ол Алматы қаласына қоныс аударып, жаттықтырушысы Скиба Вероника Викторовнамен оқуын жалғастырды.
Александра Ленің спорттық жетістіктері: 2024 жылғы Азия чемпионы, күміс және қола жүлдегері, 2023 жылғы әлем чемпионатының жеңімпазы және күміс жүлдегері, 2023 жылғы Азия ойындарының қола жүлдегері.
Ислам Сәтпаев – 1998 жылы 21 қыркүйекте Алматы қаласында дүниеге келген.
Нысана көздеуден Қазақстан Республикасының халықаралық спорт шебері.
2023 жылы Джакартада өткен әлем чемпионатының күміс жүлдегері.
Алғашқы жаттықтырушы – Дериглазова Валентина Васильевна.
Ислам Сәтбаевтың жетістіктері: 2021 жылғы Азия чемпионы, 2022 жылғы Азия чемпионатының күміс және қола жүлдегері, 2022 жылғы әлем чемпионатының қола жүлдегері, 2023 жылғы әлем чемпионатының күміс және қола жүлдегері, Қазақстан Республикасының бірнеше дүркін чемпионы.