Республика сарайында тұңғыш рет «Жас қанат. Балалар» байқауы және «Жас қанат» жас орындаушылар байқауының бірінші жартылай финалы өтті, деп хабарлайды Almaty-akshamy.kz.
«Жас қанат. Балалар» байқауына 22 үміткер қатысты. Олардың керемет өнер көрсеткені сонша, қазылар алқасы шешім шығарар алдында қиналып, ұзақ талқылады. Нәтижесінде олар үш жүлде тағайындап қана қоймай, сол жерде Гран-при туралы шешім қабылдады.
Гран-при алматылық Дастан Тұрдалыға бұйырды. 1 орынды Түркістан облысынан келген Зере Жүнісбай қанжығасына байласа, 2 орынды маңғыстаулық Әмина Асғатова иеленді. Ал 3 орынның тұғырынан Ақтөбе облысынан келген Балым Нысаналы көрінді. Жеңімпаздарға алтын, күміс және қола қанаттардан бөлек, алдағы халықаралық «Азия дауысы» фестиваліне дайындық үшін Алматы қаласының әкімі Ерболат Досаевтың атынан ақшалай гранттар табыс етілді.
«Бұл өте әсерлі сәт болды. Балалар шын жүректен ән айтқан кезде техникалық және вокалдық қабілеттері туралы ойланбайсың. Бұл тазалық, керемет ертегі, олардың сезімін сөзбен жеткізу мүмкін емес! Олардан ересектер көп нәрсе үйренуі керек. Әрине, мұнда жеңілгендер жоқ, бәрі де жеңімпаз, бәрі тамаша! Біз ұзақ уақыт бойы үздікті таңдай алмадық», - деді қазылар алқасының мүшесі, әнші, сазгер Медеу Арынбаев.
Сондай-ақ бүгін «Азия дауысы» фестивалі тақырыбындағы балалар суреті байқауының жеңімпаздары да жүлде алды. Қазылар алқасы «Қола қанатты» жезқазғандық Аида Дербіске берді. Күміс қостанайлық Кира Лантухқа бұйырды. Өзіндік ойы, қаламының қарымдылығымен көзге түскен Айсель Мұқашева «Алтын қанатты» жеңіп алды. Шығармашылық байқауға Қазақстанның барлық өңірінен балалар 311 жұмыс жіберді. Әрине, олар «Азия дауысының» не екенін білмейді.
Олар аңызға айналған байқау туралы ата-аналарынан, ата-әжелерінен сұрап білген. Дегенмен, ұсынылған жұмыстардың деңгейі таң қалдырады. Балалар әртүрлі әдістерді қолданған. Жұмыстар бірнеше санат, оның ішінде түпкі идея мен шығармашылық ойлау бойынша да бағаланды. Байқауға 169 мектеп, гимназия мен лицейден, сондай-ақ аналары арқылы, ғаламтордан байқау туралы өз бетінше білген балалар қатысты. Қазір Республика сарайының фойесінде қойылған бұл туындылар «Азия дауысы» кезінде Almaty Gallery қабырғасында қойылады. Көрермендер бұл таңғажайып көрмені көрермендердің ертеңге дейін тамашалауына мүмкіндігі бар.
