Өмір үшін күрестің биікте өткен сәті
2025 жылғы 30 мамырда Алматы–Лондон бағытындағы әуе рейсінде күтпеген жағдай орын алды: жолаушылардың бірі кенеттен өзін жайсыз сезініп, жағдайы күрт нашарлай бастады. Әуеде медициналық құралдар мен көмектесетін жағдай шектеулі болғандықтан, әрбір секундтың құны арта түсті.
Сол сәтте ұшақ бортында Перинатология және балалар кардиохирургиясы орталығының акушер-гинекологы, жоғары санатты дәрігер Салтанат Исағалиева да ұшып келе жатқан еді. Уақыт ұттырмай, ол науқасқа көмектесуге кірісіп, кәсіби тәжірибесі мен байсалды әрекетінің арқасында жолаушының жағдайын тұрақтандырып үлгерді, деп хабарлайды aqshamnews.kz.
Пациентке алғашқы көмек көрсетіліп, жағдайы жақсарғанша Салтанат Қайратқызы жанынан табылды: тексеру жүргізіп, нұсқаулықтар беріп, қолынан келген барлық жағдайды жасады. Жарты сағаттың ішінде әйелдің жағдайы біртіндеп тұрақтап, жолаушы үшін ұшу қауіпсіз болды.
Салтанат Исағалиева – медицинада 25 жылдан астам еңбек өтілі бар, акушерлік бөлімшенің жетекшісі. Оның кәсіби жолында 10 мыңнан астам босандыру мен операция, жүздеген аман қалған сәби және алғысын жаудырған мыңдаған пациент бар.
Оның еңбегі лайықты бағасын алған: ҚР Денсаулық сақтау министрлігінің «Денсаулық сақтау ісінің үздігі» атағы, «Мамандығына адалдығы үшін» құрмет медалі және «Авиценнаның алтын жұлдызы» төсбелгісі – соның дәлелі.
Бұл оқиға тек кәсібилік емес, нағыз дәрігерлік миссия — жанашырлық, жауапкершілік пен әрдайым көмектесуге дайын тұрудың үлгісі.