Телави қаласында (Грузия) Еуропалық жастар баскетбол лигасының EYBL маусымдық финалдық кезеңі — «Challenge Cup» турнирі өтті, – деп хабарлайды aqshamnews.kz тілшісі.
Алматы қаласы Спорт басқармасы өкілдерінің мәліметінше, Қазақстанның U-15 жасөспірімдер құрамасы халықаралық додада сәтті өнер көрсетіп, қола жүлдеге ие болды. Үшінші орын үшін өткен кездесуде қазақстандық жас баскетболшылар Грузияның RUSTAVI командасын 89:57 есебімен айқын басымдықпен жеңді.
Команданың бұл жетістігіне алматылық спортшылар да қомақты үлес қосты. Ұлттық құрама сапында «Алматинский легион» клубының ойыншылары Лев Горинский, Олжас Адамбеков, Ерхан Сембай және Арнур Қаңтарбай өнер көрсетті.
Турнир қорытындысы бойынша ең құнды ойыншы (MVP) атағы алматылық Олжас Адамбековке бұйырды. Ол жарыс барысында жоғары шеберлігімен, сенімді ойынымен және көшбасшылық қасиетімен көзге түсті.
Команда бас бапкер Анастасия Овечкинаның жетекшілігімен ұйымшыл ойын өрнегін көрсетіп, тәртіп пен тактикалық сауаттылықтың жоғары деңгейін паш етті. Соның нәтижесінде жасөспірімдер құрамасы халықаралық аренада табысты өнер көрсетті.
Спорт басқармасы өкілдерінің айтуынша, бұл нәтиже жасөспірімдер құрамасының дайындығы жоғары деңгейде екенін, ал алматылық баскетболшылардың ойыны қаладағы спорт резервінің әлеуетін айқын көрсеткенін дәлелдейді.