Жоба аясында жаңа газ станциясы салынып жатыр, деп хабарлайды aqshamnews.kz тілшісі.
Алматы әкімі Дархан Сатыбалды 2-ші жылу электр орталығына барып, газға көшіру жобасының жүзеге асырылу барысымен танысты.
"Жоба аясында жаңа газ станциясы салынып жатыр. Нысанның дайындық деңгейі қазір 94%-ды құрайды. Жабдықтардың 99%-ы жеткізілген. Үш газ турбиналық қондырғы мен төрт су жылыту қазандығы орнатылған. Қазір кәдеге жарату қазандықтарын монтаждау жұмыстары жүргізілуде", – деп жазды қала әкімі әлеуметтік желідегі парақшасында.
Шаһар басшысының айтуынша, 2-ЖЭО көмірден газға көшкеннен кейін зиянды шығарындылар көлемі 90%-дан астамға, яғни жылына 37 мың тоннадан шамамен 2,7 мың тоннаға дейін төмендейді деп жоспарланып отыр.
"Алматы үшін бұл жобаның маңызы зор. Бұл атмосфераға түсетін жүктемені азайтып, қаладағы ауа сапасын жақсартуға мүмкіндік береді. Сонымен қатар көмір жағудан пайда болатын күл-қож қалдықтарының түзілуі мен жиналуы тоқтайды. Іске қосу-баптау жұмыстары жақын арада басталып, оларды жылыту маусымына дейін аяқтау жоспарланған", – деді Дархан Сатыбалды.