Алматының мәдениет пен өнер қайраткерлері қазақстандықтарды 15 наурызда жаңа конституция жобасы бойынша өтетін референдумға қатысуға шақырды. Олардың пікірінше, елдің негізгі заңы мемлекет пен қоғамның болашағын айқындайды, сондықтан әр азамат оған атсалысуы керек, – деп хабарлайды aqshamnews.kz тілшісі.
«Тан-Шолпан» халықаралық тәуелсіз әйел суретшілер қорының президенті, Қазақстан Суретшілер одағының мүшесі Жәмила Тәкен шығармашылық қауым өкілдері де жаңа конституция жобасын мұқият қадағалап отырғанын және мәдени саланың әрі қарай дамуына үміт артатынын атап өтті.
«Біз конституцияны қолдаймыз. Бұл еліміз үшін маңызды саяси қадам, өйткені барлығымыз мемлекетіміздің тағдыры мен болашағына алаңдаймыз. Жаңа Конституция өз заңдылығын көрсетіп, елдің тұрақты дамуына мүмкіндік береді деп үміттенеміз. Мен, суретші ретінде, өнер мен мәдениет, соның ішінде бейнелеу өнеріне лайықты көңіл бөлінгенін қалаймын, өйткені өнер көбінесе мемлекеттің бет-бейнесі», — дейді ол.
Жәмила Тәкеннің айтуынша, суретшілер мен өнер қайраткерлерінің үлесі елдің дамуы мен мәдени мұрасын қалыптастыруда маңызды рөл атқарады.
«Суретшілер мемлекеттің дамуына үлкен үлес қосады. Өнер қоғамның рухани жағдайын, тарихы мен құндылықтарын көрсетеді. Сондықтан мәдениет пен өнердің дамуына мемлекет мүдделі. Біз өнер қайраткерлерінің еңбегі лайықты бағаланатынына үміттенеміз», — деп қосты ол.
Әуезов атындағы Әдебиет және өнер институтының халықаралық қатынастар және әлем әдебиеті бөлімінің меңгерушісі Светлана Ананьева да алдағы референдумның ел азаматтары үшін маңыздылығын атап өтті.
«Еліміз жаңа конституцияны талқылау мен қабылдау жөніндегі референдумға дайындалып жатыр. Бұл — мемлекетіміздің негізгі заңы, балаларымыз бен болашақ ұрпағымыз соған сай өмір сүреді. Референдум — бұл бүкіл халықтық талқылау, әр адам қатысып, пікір білдіріп, ұсыныс жасай алады. Дауыс берудің нәтижесі ақпарат құралдарында жарияланады», - дейді.
Светлана Ананьеваның айтуынша, конституцияның жаңа нұсқасында ғылым, білім, тәрбие мен экология мәселелерінің дамуына ерекше көңіл бөлінген.
«Бұл бағыттар еліміздің болашағы үшін өте маңызды. Әр азаматтың шығармашылық еркіндігі мен пікір білдіруіне қақы бар. Бәріміз референдумға барып, елдің өркендеуіне үлес қосамыз», — деп түйіндеді.