Алматы әкімдігі жағдайды бақылауда ұстап отыр, деп хабарлайды aqshamnews.kz тілшісі.
Алматының Алатау ауданындағы «София» тұрғын үй кешенінде 11 қыркүйекте ыстық су беру уақытша тоқтады. Бұған МИБ, басқарушы компания және энергиямен жабдықтаушы ұйым арасындағы берешек пен реттелмеген шарттық мәселелер себеп болған. Жағдайға әкімдік араласқан соң сол күні сағат 23:20-да қазандық қайта іске қосылып, тұрғындарға ыстық су беру қалпына келтірілді.
Қолда бар дерек бойынша тұрғын үй кешені тұрғындарының электр энергиясы үшін жалпы берешегі 24,83 млн теңге. Бұдан бөлек, автономды қазандықтың жұмысына қатысты шамамен 7 млн теңге берешек бар. МИБ мәліметінше, жекеменшік қазандық электр қуатын тұрғын үй кешенінің желілері арқылы пайдаланады, алайда оны электрмен жабдықтауға жеке шарт жасалмаған.
Тұрғындардың өтінішінен кейін оқиға орнына Алатау ауданы әкімі аппараты мен Алматы әкімдігінің жауапты басқармаларының өкілдері барды. Олар МИБ, «Volden V» ЖШС басқарушы компаниясы және энергиямен жабдықтаушы ұйым өкілдерімен бірге мәселені реттеу және ыстық су беруді қалпына келтіру жұмыстарын жүргізді.
Қазір қазандық қалыпты режимде жұмыс істеп тұр.
«София» тұрғын үй кешені 2022 жылы пайдалануға берілген кешен 14 үй мен 841 пәтерден тұрады. Басқарушы компаниясы – «Volden V» ЖШС.
Алматы әкімдігі жағдайды бақылауда ұстап отыр. Қазіргі уақытта тараптар берешек пен шарттық қатынастарға байланысты мәселелерді заңнама талаптарына сәйкес реттеу жұмыстарын пысықтап жатыр.