2026 жылы Алматы қаласы Музейлер бірлестігіне қарасты "Райымбек батыр" заманауи музейлендірілген мемориалдық кешені ашылады. Бұл туралы Өңірлік коммуникациялар қызметінде өткен брифингте Алматы қаласы Мәдениет басқармасының басшысы Данияр Алиев мәлімдеді.
Кешен тарихи тұлғаның өмірі мен ерлігін заманауи форматта көрсетуге арналған музейлендірілген кеңістік ретінде жобаланып жатыр.
Кешеннің негізгі құрамдас бөліктері:
- Райымбек батырға арналған ескерткіш: тарихи тұлғаның бейнесін заманауи сәулет стилінде көрсету, оның ерліктерін және батырлық дәстүрін дәріптеу.
- Экспозициялық залдар: батырдың өмір жолы, жауынгерлік ерліктері және тарихи дәуірін сипаттайтын интерактивті көрмелер. Қонақтар мультимедиялық бейнелер, 3D-модельдер және тарихи реконструкция арқылы батырдың өміріне көз жеткізе алады.
- Білім беру және мәдени кеңістіктер: арнайы залдар, мастер-класстар, лекциялар мен семинарлар үшін интерактивті орындар. Мұнда жас ұрпаққа патриоттық тәрбие беруге, батырлық дәстүрлерді насихаттауға арналған арнайы бағдарламалар қарастырылған.
- Виртуалды және мультимедиялық жобалар: келушілер VR-турлар арқылы тарихи шайқастарға қатыса алады, виртуалды көрмелер және интерактивті презентациялар арқылы Қазақстанның мәдени мұрасын зерттей алады.
Мемориалдық кешеннің негізгі мақсаты – өңір тарихын, қазақ халқының мәдени және рухани мұрасын халыққа қолжетімді, қызықты және білімді форматта ұсыну. Кешен туристер мен қала тұрғындарына рухани тәжірибе беріп, Алматыны еліміздің мәдени және тарихи туризмінің орталығына айналдыруға атсалысады.
Сонымен қатар, Алматы қаласында "Observatorium" музейі ашылады. Аумағы 130 шаршы метрді құрайтын бұл музей ғылымды, астрономияны және заманауи технологияларды насихаттауға бағытталған. Мұнда келушілер:
- Ғарыш пен астрономиялық құбылыстарды зерттеуге арналған интерактивті экспозициялар;
- Білім беру зертханалары және ғылыми тәжірибелерді қолмен орындау мүмкіндігі;
- Ғылыми көрсетілімдер, мультимедиялық инсталляциялар және виртуалды симуляциялар арқылы білім алу;
- Заманауи технологияларды, робототехника және физика заңдылықтарын қолжетімді әрі қызықты форматта меңгеру мүмкіндігіне ие болады.
Бұл екі жаңа мәдени және ғылыми орын Алматы қаласын тек туристік емес, сонымен қатар білім мен ғылым орталығы ретінде танымал етуге зор мүмкіндік береді. Музейдің қорытынды бөлігін телескоп арқылы жұлдызды аспан мен планеталарды тікелей бақылауға болатын тірі бақылау кеңістігі құрайды. Бұл аймақ адам мен шексіз Ғалам арасындағы философиялық байланысты сезінуге мүмкіндік береді.
"Observatorium" музейінде жасанды интеллект технологияларын енгізу, соның ішінде "Ғалам бойынша VR-саяхат" интерактивті жобасын іске қосу және робот-экскурсоводты енгізу жоспарлануда.
Данияр Алиев, Алматы қаласы Мәдениет басқармасының басшысы:
"Райымбек батыр кесенесі мен Observatorium музейі – бұл тек туристік нысандар ғана емес, олар – біздің тарихымызды, мәдениетімізді және ғылымдағы жетістіктерімізді келешек ұрпаққа жеткізудің жаңа тәсілі. Келушілер осы жерден рухани және интеллектуалды тәжірибе алады".