Алматыда қоғам қайраткерлері мен диаспора өкілдері жаңа Конституция жобасы бойынша өтіп жатқан республикалық референдумға қатысып, таңдау жасады. Олар қала тұрғындарының дауыс беруге деген қызығушылығы жоғары екенін атап өтті, – деп хабарлайды aqshamnews.kz тілшісі.
Қазақстан халқы Ассамблеясының мүшесі Всеволод Лукашевтің айтуынша, өзі дауыс берген учаскеде тұрғындардың белсенділігі байқалған.
«Бүгін еліміз үшін де, менің отбасым үшін де маңызды күн. Бұл әр азамат елдің болашағы туралы пікір білдіріп, мемлекет алдындағы жауапкершілігін сезінетін күн», — деді ол.
Қоғамдық кеңестің және Қазақстан халқы Ассамблеясының мүшесі Рустам Қайрыев те дауыс беріп, учаскелерде жылы әрі достық атмосфера қалыптасқанын айтты.
Дауыс беруге Алматыдағы этномәдени бірлестіктердің өкілдері де қатысты. Қазақстан күрдтері «Барбанг» қауымдастығы басқарма кеңесінің төрағасы Рафик Мирзоев қаладағы күрд қауымдастығы қоғамдық өмірге белсенді араласып отырғанын жеткізді.
Алматыдағы ауған қауымдастығының өкілі, «Алматы жастары» РҚБ өкілдігінің төраға орынбасары Омар Мохаммедсаруар этномәдени бірлестіктер өкілдері де референдумға белсенді қатысып жатқанын айтты.
Диаспора өкілдерінің айтуынша, дауыс беруге қатысу — азаматтық жауапкершіліктің көрінісі әрі елдің дамуына қатысты мәселелер бойынша ұстаным білдіруге мүмкіндік.