Мәскеуде халықаралық мейрамханалық сыйлық - WHERETOEAT INTERNATIONAL 2026 табыстау рәсімі өтті. Бұл сыйлық Michelin Guide және The World’s 50 Best Restaurants рейтингтерінің бәсекелесі саналады, – деп хабарлайды aqshamnews.kz тілшісі.
Сыйлық Ресей, Қазақстан, Беларусь, Әзербайжан, Армения, Грузия және Өзбекстан мейрамханаларын біріктірді.
Байқау қорытындысы бойынша Алматыдағы AUYL мейрамханасы ең үздік ондыққа еніп, жалпы рейтингте 8-орынды иеленді.
«Жыл рестораторы» номинациясында Алматы өкілі, ABR холдингінің негізін қалаушы Аскар Байтасов жеңіске жетті.
Сыйлық нәтижелері Қазақстанның, атап айтқанда Алматының халықаралық гастрономиялық индустриядағы рөлінің артып келе жатқанын көрсетіп, мейрамхана бизнесінің жоғары деңгейде дамығанын растады.
«Алматыдан шыққан мейрамхананың үздік 10-дыққа енуі және ел өкілінің негізгі номинациялардың бірінде жеңіске жетуі — Қазақстанның гастроиндустриясы жеткен деңгейдің айқын көрсеткіші», — деп атап өтті сыйлық ұйымдастырушылары.
Алматы - елдегі ең ірі туристік орталықтардың бірі: өткен жылдың 9 айында қалаға 1,87 млн адам келген, оның ішінде 563 мыңнан астамы - шетелдік туристер.
Гастрономия қала туристік тартымдылығының негізгі факторларының бірі болып қала береді: туристер шығындарының 27%-ға жуығы тамақтану мен мейрамханаларға баруға жұмсалады.