Алматыда бизнес қауымдастығының өкілдері қала тұрғындарына алдағы жалпыұлттық референдумға қатысуға шақырып, үндеу жасады. Олардың айтуынша, мұндай маңызды оқиғаға қатысу — әр азаматтың елдің болашағына үлес қосуына мүмкіндік береді, – деп хабарлайды aqshamnews.kz тілшісі.
Қазақстандықтарға жасалған үндеуді қолдағандар қатарында Арманжан Байтасов, Бейбіт Әлібеков, Мақсат Қиқымов, Раушан Әубәкіркызы, Ерлан Жайлаубай мен Гүлнара Бижанова сияқты танымал бизнес пен қоғам қайраткерлері бар.
Олар белсенді азаматтық ұстаным мемлекет дамуы үшін маңызды рөл атқаратынын атап өтті. Кәсіпкерлердің пікірінше, референдум — қоғамға елдің болашақ бағытын айқындайтын шешімдерді қабылдауға мүмкіндік беретін демократияның маңызды құралы.
Бизнес өкілдері Қазақстанның экономикалық дамуы, тұрақтылығы мен әл-ауқаты көп жағдайда азаматтардың қоғамдық үдерістерге белсене атсалысқанына байланысты екенін айтты.
Сондықтан олар алматылықтарды жауапкершілік танытып, сайлау учаскесіне келуге шақырды.
«Біздің таңдауымыз елдің, балаларымыз бен келер ұрпақтың болашағын айқындайды», — деп атап өтті бизнес қауымдастығының өкілдері.
Сөз соңында олар Алматы тұрғындары осы жолы белсенді болып, маңызды оқиғадан сырт қалмайтынына сенім білдірді.