Архитектура, дизайн және инженерия колледжі (АДИК) Қазақстан Президенті жариялаған «Жұмысшы мамандықтар жылы» аясында құрылыс, архитектура, тұрғын үй-коммуналдық шаруашылық және өндіріс салаларында жұмысшы кадрларды даярлайтын жетекші білім беру орталықтарының бірі ретінде өз позициясын нығайтуды жалғастыруда.
Өңірлік коммуникациялар қызметінің баспасөз конференциясында колледж директоры Камал Жамангозов оқу орнының негізгі жетістіктері мен алдағы жоспарларын таныстырды, деп хабарлайды aqshamnews.kz.
Спикердің айтуынша, 1956 жылы негізі қаланған АДИК әртүрлі экономика салаларында сұранысқа ие 50 мыңға жуық маман даярлаған. Қазіргі уақытта колледжде мемлекеттік тапсырыс бойынша 820 студент білім алуда, олардың 35%-і оқуын Алматыдағы жетекші компанияларда тәжірибелік жұмыстармен ұштастырып жүр.
Оқу орнының тиімділігінің маңызды көрсеткіштерінің бірі – түлектерді жұмысқа орналастыру деңгейінің жоғары болуы. 2023 жылы студенттердің 84%-ы жұмыспен қамтылса, 2024 жылы бұл көрсеткіш 88%-ға дейін өсті.
«Колледж шағын және орта бизнестің 65-тен астам кәсіпорнымен белсенді түрде ынтымақтастық орнатып, студенттерге практикалық білім алуға және әрі қарай жұмысқа орналасуға мүмкіндік береді», – деді Камал Жамангозов.