Алматыда «Гендерлік зорлық-зомбылыққа қарсы 16 күн белсенді іс-қимыл» атты жыл сайынғы республикалық науқаны аясындағы алғашқы акция өтті.
Бұл басқосу студенттерді, түрлі сала мамандарын және құқық қорғау органдарының өкілдерінің басын қосып, зорлық-зомбылықтан қорғану, өзіңді және жақындарыңды қауіптен сақтау тақырыбын талқылауға мүмкіндік берді, - деп хабарлайды Aqshamnews.kz.
Акцияны Алматы қаласы Жұмыспен қамту және әлеуметтік бағдарламалар басқармасына қарасты «Отбасын қолдау орталығы» КММ, Алматы әкімі жанындағы Әйелдер істері және отбасылық-демографиялық саясат жөніндегі комиссия, сондай-ақ қалалық полиция департаменті ұйымдастырды.
Іс-шара Нархоз университетінде өтіп, 100-ге жуық адам қатысты. Ашық диалог барысында студенттер сұрақ қойып, пікір алмасты. Ал мамандар дағдарыс жағдайында дұрыс шешім қабылдау жолдарын, сондай-ақ қандай жағдайда қай жерден көмек сұрауға болатынын түсіндірді.
Акция аясында Полиция департаментінің қызметкерлерімен өткен талқылауларда жастарға зорлық-зомбылық қатері төнген кезде қолданылатын нақты қорғану тәсілдері мен әрекет ету тәртібі егжей-тегжейлі түсіндірілді. Сонымен қатар психологтар, әлеуметтік қызметкерлер мен заңгерлер кеңес беріп, жастарға сауатты қарым-қатынас орнату, алғашқы қауіп белгілерін байқау және қауіпті жағдайды жасырмай баяндау жөнінде ұсыныстар айтты. Қатысушыларға тәулік бойы қолдау көрсететін қызметтер туралы да ақпарат айтылды.
Жастар кездесуге белсенді қатысып, мұндай іс-шаралардың жеке қауіпсіздікке қатысты мәселені жақсырақ түсінуге септігін тигізетінін атады. Ұйымдастырушылардың айтуынша, жоғары оқу орындарындағы осындай акциялар жастардың құқықтық сауатын арттырып, өзара құрметке негізделген қауіпсіз қарым-қатынас мәдениетін қалыптастыруға ықпал етеді.
Айта кетейік, «Гендерлік зорлық-зомбылыққа қарсы 16 күн белсенді іс-қимыл» республикалық науқаны 10 желтоқсанға дейін жалғасады. Алматыда кездесу, тренинг, диалог, акция мен көрме сынды 20-дан астам іс-шара өткізу жоспарланып отыр. Бұл іс-шараларда әйелдер мен балаларды қорғау мәселесіне, сондай-ақ жастар арасында зорлықсыз мінез-құлық мәдениетін дамытуға ерекше көңіл бөлінбек.
