2026 жылғы 20 сәуірде КМҚК «Алматы көпсалалы колледжі» Құзырет орталығында «Алматы қаласы жастарын ақпараттандырудың инновациялық құралдары мен әдістері» тақырыбында қалалық Жас сайлаушылар клубының үшінші отырысы өтті, – деп хабарлайды aqshamnews.kz тілшісі.
Іс-шараны Алматы қаласының аумақтық сайлау комиссиясы ұйымдастырды. Отырысқа Жас сайлаушылар клубының мүшелері, аумақтық комиссия өкілдері, сондай-ақ шақырылған қонақтар қатысты. Қатысушылардың жалпы саны 40-тан асты.
Қатысушыларды Алматы қаласының аумақтық сайлау комиссиясының төрағасы Айгүл Қалықова құттықтап, жастар арасында электоралды мәдениетті арттыру және ақпараттандырудың заманауи тәсілдерін енгізу бағытындағы жүйелі жұмыстың маңыздылығын атап өтті.
Отырыстың негізгі бағдарламасы аясында жастарды ақпараттандырудың инновациялық құралдарын әзірлеу және қолдану мәселелері қарастырылды. Жиында Әуезов ауданы Жас сайлаушылар клубының төрағасы Бауыржан Маханбет баяндама жасады, ол тиімді коммуникациялық шешімдерді қалыптастырудың практикалық тәсілдерін таныстырды.
Сонымен қатар қатысушылар жастардың электоралды процестерге тартылуын арттыру, ақпараттандырудың нысандары мен әдістері, сондай-ақ жас азаматтардың сайлау науқандарына қатысуының заманауи стратегиялары мәселелерін талқылады. Өз ұсыныстары мен бастамаларын аудандық клуб өкілдері – София Полякова (Алмалы ауданы), Иманжан Сыздық (Медеу ауданы) және Гүлназ Жексен (Наурызбай ауданы) ұсынды.
Талқылау барысында қатысушылар жастар мен сайлау органдары арасындағы диалогтың маңыздылығын, сондай-ақ тәжірибе алмасу мен жастар бастамаларын іске асыруға арналған алаңдарды одан әрі дамыту қажеттігін атап өтті.