Алматыда Жаңару күнінде 400-ден астам ағаш егілді, – деп хабарлайды aqshamnews.kz тілшісі.
Наурыз мерекесі қарсаңында Алматыда коммуналдық қызмет пен жергілікті тұрғындар қатысқан аумақтарды тазалау және көгалдандыру бойынша экологиялық акция өтті. Жалпы мереке қарсаңында 1000-нан астам көшет отырғызылды, оның ішінде 400-ден астамы Жаңару күні аясында егілді.
Мәселен, Түрксіб ауданында Қонаев атындағы өндірістік кооператив аумағында жапырақты ірі 139 ағаш егілді.
Әуезов ауданындағы №1 шағынаудан скверінде 30жапырақты ағаш көшеті отырғызылды.
Ұйымдастырушылар мұндай бастамалардың экологиялық жағдайды жақсартуға бағытталғанын атап өтті.
Аудандағы акцияға жүзден астам адам, атап айтсақ еріктілер, оқушылар, студенттер және жергілікті тұрғындар қатысты. Олар қаланы көгалдандыру мен қоршаған ортаны жақсарту үшін жиналды.
Іс-шараға қатысушылардың бірі Ғалия Ермұханова ағаш егумен қатар, оларға тұрақты күтім жасау маңызды екенін айтты.
«Ағашты күтіп-баптауға тұрақты суару, санитарлық және қалыпқа келтіріп кесу, зиянкестермен күресу және топырақты қопсыту кіреді. Бірнеше жыл өткен соң еңбегіңнің нәтижесін көру ерекше қуаныш сыйлайды», — деді ол.
Сонымен қатар, Наурызбай ауданында Абай даңғылы мен Әшімов көшесінің қиылысында 75 ірі ағаш егілді.
Жетісу ауданындағы «Ратушный» скверінде 50 жапырақты ағаш көшеті отырғызылды. Алмалы ауданында Розыбакиев көшесінің бойында (Дүйсенов көшесінің қиылысында) 20 ірі ағаш егілді.
Айта кетейік, «Таза Қазақстан» бағдарламасы аясында 2025 жылы Алматыда 420 мыңнан астам жасыл желек отырғызылды. Оның ішінде 42 мың ағаш (5-6 метрлік 5 мың ірі ағаш және 2,5 метрлік 37 мыңнан астам көшет) бар. Сонымен қатар, буферлік аймақтарды көріктендіру аясында 380 мың бұта егілді.