Оның Алмалы ауданында жасалған төрт ұрлық дерегіне қатысы бар екені анықталды, деп хабарлайды aqshamnews.kz Polisia.kz-ке сілтеме жасап.
Алматы қаласында көпқабатты тұрғын үйлердің ауласынан велосипед ұрлады деген күдікпен ер адам ұсталды. Тергеу деректеріне сәйкес, 1981 жылы туған азамат көпқабатты үйлердің кіреберісіне кедергісіз кіріп, иесіз қалған велосипедтерді ұрлап жүрген.
- Ұсталған адам стандартты тізбек бойынша әрекет еткен. Ашық қалған подъездерді іздеп, еркін кіріп, жалпы дәліздерде қалдырылған мүлікті алып кетіп отырған. Құрметті қала тұрғындары, велосипедтерді, самокаттарды және өзге де заттарды кіреберістерде, холлдарда, баспалдақ алаңдарында қалдырмауларыңызды сұраймыз. Бұл жерлер қауіпсіз болып көрінсе де, мүлкіңіздің қауіпсіздігін қамтамасыз ету үшін құлыптар қолданыңыздар және техниканы жабық бөлмелерде сақтаңыздар, - деді Алмалы аудандық полиция басқармасының бастығы Мақсат Пшан.
Жоғарыда аталған деректер бойынша қылмыстық іс қозғалды. Күдікті уақытша ұстау изоляторына қамалды. Осыған ұқсас басқа да оқиғаларға қатысы бар-жоғын тексеру жалғасуда.
